كلام القهاوي واللي كيروج كولو فيه نقاش كبير واليوم فهاد التسخينات الإنتخابية كلها كينش على كبالتو وكيعيط أجباد ماعندك من علاقات ونفود سياسي وحتا الشكارة اللي اليوم الداخلية ماقابلاش هاد المنطق فهاد الولاية المقبلة .
إقليم صفرو كثر فيه اللغط على التزكيات الإنتخابية اللي صراحة خاص القيادات السياسية ينزلو للقواعد وينظمو لقاءات ويسولو على المرشحين مزيان وأول حاجة هي الإلتزام الحزبي ماشي نقز من هنا وجا لهيه وعطاوه التزكية ، الا ماكانوش كيعرفوهوم وعندهوم كفاءة وقدرة فالتسيير والتدبير ومعرق فالحزب يعني ” مناضل حزبي ” وكيحضر وكيآمن بالمشروع والبرنامج ماعندهوم لاش يضيعو الوقت معاه .
و فهاد الفترة الحاسمة اللي كتحدد مصير المواطنين لمدة خمس سنوات ، كنشوفوا أن الواقع السياسي كيعرف ميوعة كبيرة وباش نستدركوا الأمر خاص تكون الشرعية والمشروعية ويكون ” الناخب ” اللي غايكون برلماني المستقبل أولا عارف المهام ديالوا والإختصاصات ديالوا وبلا منزيد نقول عندو على الأقل مستوى الإجازة وحتا الشرط ديال المتابعة القضائية مهم ماشي يكون ” موسخ ” وأدخلوها بصباطكم .
Comments
0